SHACABKA SOOMAALIYEED OO SU’AALO WEYDIINAYA SH. SHARIIF IYO SHABAAB?

13 Maarso 2010 SMC

SU’AALAHA AAN WEYDIINAYO SH. SHARIIF:

SU’AASHA 1aad: Sh. Shariif, maalim dhaweyd shir jaraa'id oo aad qabatay waxa aad mucaaradkaaga uga codsaatay in ay nabadda qaataan oo ay dowladdaada la heshiiyaan si dadka loo badaadiyo, isla kelmaddii kuugu xigtayna waxa aad ku soo dhaweysey cunaqabateyntii mucaaradka la saaray, markaa 2 middee la dhihi karaa, midda 1aad: in nabadda aad ugu baaqday ay been kaa tahay oo aad hoosta ka leedahay allow aysan aqbalin, adoo dawladaha aad kaalmada weydiisato ee shuruuudaha kuugu xira dib u heshiisiinta, raba aad tusto in ay nabaddii diideen, waayo adiga oo soo jiidaya ayaad haddana sii fogeynaysaa, iyo midda 2aad:  in aadanba is ogayd oo waxa aad ku hadlayso aadanba la socon?

SU’AASHA 2aad:: Sh. Shariif, goormaa kuugu dambeysey magacan aad wadato ee Shiikha, aawayse aayadihii iyo axaadiistii aad soo qaadan jirtey berigii aad C-laahi Yusuf mucaaradka ku ahayd, waadigan isagii uun dhinac walba ka beddelaye sida jagadiisii, aayad iyo xadiis la’aantiisii, dulmigiyo caddaalad darradii iyo arxan darradiisiiye ma khiyaano xun ayaad wadatay?

SU’AASHA 3aad: Sh. Shariif, Maalin walba diyaarad un baad saarantahay, waxa aadna afka ku haysaa oo aad reer galbeedka wax uga raadsataa Argagixiso iyo alqaaciddaa joogta dalka,  goormaa kuugu dambeysey mar aad bariso ilaahii ku abuurtay?

SU’AASHA 4aad: Sh. Shariif, iyada oo maatidii soomaaliyeed iyo ehelkii aad ka soo jeeddeyba la gumaadayo ayaad marka aad khudbaynayso iska qososhaa oo aad isaga faraxsantahaye sidee wax yihiin, waadigii berigii aad mucaaradka ahayd aan qosli jirin oo careysnan jiraye ma qaabkaan ayaad raadinaysey oo ummadda la xasuuqayo iyo doollarkan ayaad ku faraxsantahay?

SU’AASHA 5aad: Sh. Shariif, Waxa aad ogtahay in Seyd-cumar RC yiri haddii Weyl lo’aad habartii lahayd uga cararto ciraaq ee inta ay ereyeyso geed marada ka dillaaciyo, inuu ilaahay igu ciqaabo maxaad dariiqa ugu sallixi waysey ayaan ka cabsanayaa,  haddaba Sh. Shariif wax alla waxa soomaali ka baaba’aya, kuwa xabbaddu dilayso, kuwa badaha ku daadanaya, kuwa cudurradu laynayaan,  kuwa masasku ku cunayaan daafaha xamar iyo kuwa xeryaha qaxooti ku jira sow ma ogid in ilaahay kugula xisaabtami doono mise waxaas oo dhan waxba kaa qaadi maayaan oo karti baad u leedahay naarta ilaahay?

SU’AASHA 6aad: Ciidankaaga ayaa ummaddii eber ka dhigay oo dhac iyo boob ku hayee ma habaarantahay xaggaa luguu wataa, maad hoos isu fiirisid meesha aad marayso?

SU’AASHA 7aad: Ugu dambayn, Taangi Amisom ayaad megensatee xaggaad ku ogtahay ummaddaas aad adigu tiri anaa u madaxweyne ah oo ka mas’uul ah, kumana arki karno adiga oo taangigaas ayaa naga kaa xigee xaggaan kaaga dacwoonnaa?

SU’AALAHA AAN WEYDIINAYO AL-SHABAAB

SU’AASHA 1aad: Shabaab su’a’asheyda ugu horraysa ee aan ku weydiinayo, maxaad guryaha maatidu ku nooshahay hoobiyaha ula hor tagtaa, jawaabta soo dhacaysana ugaga carartaan ma dadkaad cadaawad fog u qabtiin mise waad miyir la'dihiin?

SU’AASHA 2aad: Maxaad ramadaankii hoobiyaha aad ku ridaysaan AMISOM iyo Dowaladda shariif ula fiirsan jirteen suxuurta iyo afurka ma dadka soomi raba ayaad rabteen inaysan suxuuran oo aysan soomin, markaad afurka la eeganayseenna ma waxaad rabteen intii mitidday ee suxuur la’aan iska soontay in aysan afurin si aysan soon dambeba u soomin, ma diintaad caaawad fog u qabtiin?

SU’AASHA 3aad: Maxaad ilmo 15 jir ah ugu salladdeen inuu argagixiyo 100 jir indho, sow markaa argagixisada la idinku sheego ma ihidin, diintee iyo caqligeese qaba dhaqankaas oo kale, sow rasuulku  SCW ma dhihin ummadda islaamka kama mid aha ruuxii aan ruuxa ka weyn ixtiraamin, iska daa waayeel indha la’e xataa 5 jir indho la’ hadduu edeb-darro sameeyo ayaan la dili karine, idinku maxaad tihiin miyaadnaan bini’ aadan dareen leh ahayn?

SU’AASHA 4aad: Waxa aad la socotiin in rasuulku CSW, 9 qof awgood u joojiyey jihaadkii gaalada loo aadi lahaa, idinkuna waxaad jihaad sheeganaysaan malaayiin muslimiin ah oo aad madaafiic ku garaacaysaan mid aad riddiin iyo mid aad sababtiinba, markaa sow run noqon mayso culummada idinku sheega Khawaarij, illeen caaamadaha khawaarijtu sidaas bay ahaayeene maad is koontaroosaan?

SU’AASHA 5aad: Weligiin hoos ma isu fiiriseen in wax idinka qaldanyihiin iyo in kale, ilaahayse in dhulka gaalo iyo islaam u joogaan oo uu ku abuurtay wuu ogaaye ma idinkuu idiin soo diray oo idin yiri dhulka ka dhammeeya islaamka iyo gaalada, haddaad diin u dirirayseense sow ma ogidin waxan aad waddeen dartood in dadkii qaxay intaad dagaallada waddeen in badani gaaloobeen, dumar badanna la kufsaday oo la dullaystay, allaa weyne ma dullaynta ummaddaa la idiin soo diray?

SU’AASHA 6aad: Sow ma cadda in aad cadow soomaaliyeed wakiil u tihiin oo aad dalka iyo dadkaba gacan gelinaysaan mar dhaw?

SU’AASHA 7aad: Ugu dambayn ehel iyo qaraabo dhammaysee xaggee la idinkaga dacwoodaa ama la idinkala xiriiraa, dhakhtar caafimaadse ma leedihiin?

Ali Jeyte <bartilmaameed@gmail.com

Somaliweyn Media Center (SMC)
Muqdisho Somalia

	Web You Domainame