Hargeysa Isniin 08 Febraayo 2010 SMC

Tirada dhimashada Tahriibayaal ku soo caaryay xeebta Sanaag oo kordhay

“Waxay u baahan yihiin gargaar degdeg ah, waxaana dhici karta in khasaaruhu…”

Madaxa laanta Socdaalka G. Sanaag…..Waraysi GAAR AH 

Ceerigaabo 08, Feb.2010 (Ogaal)- Ugu yaraan 10 qof ayaa ku dhintay, ka dib markii Laash ay saarnaayeen kula soo caaryay xeebaha gobolka Sanaag ee Bariga Somaliland.

Sida uu Wargeyska Ogaal u sheegay madaxa laanta Socdaalka ee gobolka Sanaag Saciid Cige Maxamed, dadkaa dhintay waxay ka mid ahaayeen 110 Tahriibayaal ah oo Doon ka raacay xeebaha Puntland, kuwaasoo Laashkii ay wateen markii uu xumaaday kula soo caaryay xeebta tuulada Waqdariya oo 25 Km Galbeed ka xigta degmada Laasqorey.

Waxa uu sheegay inay haatan xaaladoodu liidato ilaa 70 qof oo ka mid ah Tahriibayaashaas oo Itoobiyaan u badan, isla markaana la la’yahay ilaa 30 kale, kuwaasoo ku sii jeeday dalka Yemen. “Waxa la xumaaday Laashkii ay wateen, waxayna ku soo caaryeen xeebta Waqdariya,” ayuu yidhi. “Dadkani waa Itoobiyaan. Xog badan kama hayno, mana ogin inta maalmood ee ay Doonta dulsaarnaayeen, laakiin Tahriibayaashu waxay noo sheegeen inay ku socdeen Yemen, kana yimaadeen Boosaaso,” ayuu raaciyay Siciid Cige oo xalay khadka telefoonka ugu waramay Wargeyska Ogaal.

Waxa uu sheegay in xaalada dadkaa ay haatan Ciidanka Xeebuhu ku hayaan Waqdariya ay la socodsiiyeen hay’addaha gargaarka degdega ah ee gobolkaa ku sugan. “Waxay u baahan yihiin gargaar degdeg ah, waxaana dhici karta in khasaaraha dhimashadu sii kordho. Waxaanu ku wargelinay hay’adda Bisha Cas ee Ceerigaabo oo noo sheegay inay u baxayaan degaankaas,” ayuu yidhi Madaxa laanta Socdaalka gobolka Sanaag. “Waxay ahaayeen 110, ilaa todobaatan waa la hayaa, kuwii dhintay waa la aasay, intii kalena baadi-doonkoodaa lagu jiraa,” ayuu raaciyay. “Inta la hayo, waxa ku jira qof keliya oo Soomaali ah,” ayuu yidhi Mr. Siciid Cige.

Tahriibayaasha ka socdaalada xeebaha Puntland oo Doonyo liita ka raaca Boosaaso, intooda badana u socdaala Yemen iyo Sucuudiga, waxay la kulmaan dhibaatooyin galaafta ama halis geliya naftooda. 

Shirguddoonka Guurtida oo shaaciyay waqtiga ay soo af-jaryaan khilaafkii u dhaxeeyay 

  “Ilmaadeerayaaloow haddaydaan midoobayn, waxaad na tidhaahdaan Shirguddoon kale keena”

Xil. Dheeg 

Hargeysa, 08 Feb, 2010 (Ogaal)-  Guddoomiyaha Golaha Guurtida Somaliland Saleebaan Maxamuud Aadan, ayaa markii u horraysay shaaciyay waqtiga ay rasmiyan heshiis buuxa ka gaadhayaan khilaafkii kala qaybiyay Golahaas.

Guddoomiye Saleebaan Maxamuud waxa uu arrintan kaga hadlay Fadhigii shalay ee Golaha Guurtida oo uu guddoominayay, waxaanu sheegay in khilaafkii u dhaxeeyay Shirguddoon ahaan ay soo af-jarayaan, isla markaana waxay isla gartaan ay Golaha horkeeni doonaan.

Guddoomiyuhu wuxuu sheegay in maadaama dhinacooda khilaafku ka yimi ay tahay in ay xal keenaan. “Wixii dhibaatooyin ah ee dhex yaalay golaha, waxaad mooddaa in Goluhu Anaga (Shirgudoonka) nagu soo riixay, mar haddii aad leedihiin idinkiiba is-hayee xal noo keena, waxaan ka idhaahdaa ma jiraan. Haddii aanu eedaysaneyaal noqonay waa inaanu anagu xalkii keenaa.” Ayuu yidhi Guddoomiye Saleebaan oo ka hadlayay fadhigii shalay ee Golahaas. Waxaanu intaa raaciyay oo uu yidhi, “Mudadaba Arrintani way jiitameysay kolay shan todobaad way tahay sadex aan joogay iyo laba aan maqnaaba. Waxaan leeyahay wixii aanu xal u aragno waxaanu isla qaadanay inaanu u gondo-degno, taayada (Shirgudoonka) ta golaha ayaa ka weyn. In kasta oo aad iska soo dudeen (leexiseen), haddana Goluhu waa qeybsan yahay, markaa waxaan odhan lahaa ducaysanay oo wax wada cunay, kuna faataxasanay.”

Saleebaan Maxamuud waxa uu ka hadlay muddada ay Shirguddoon ahaan xal ka gaadhayaan khilaafka oo ay soo af-jarayaan. “Xeerka xakamaynta hubka fudud waanagii sabtidii idiin qeybinay sidii caadadu ahaan jirtay xeerka maanta laga bilaabo 48 saacadood ku soo darsa. Anaguna 48 kaasi saacadood arrinta khilaafka waa inaanu ka keenaa wixii xal ah Isniinta iyo Salaasada waynu kala maqnaanaynaa oo Arbacada ayaynu isku imanaynaa. Goluhuna hawshiisa ha wato, Anaguna Shirgudoon ahaan waa inaanu wixii aad na farteen galnaa oo keenaa.” Ayuu yidhi Guddoomiyuhu.

Intaa ka dib, mudanayaal uu ka mid yahay Xildhibaan Maxamed Maxamuud Yaasiin (Dheeg) oo halkaa hadallo ka jeediyay, ayaa isaga oo dhawaaqaya hadalladiisii waxa ka mid ahaa, “Waxaanu ku cel-celinay waar khilaaf kale nama hayo oo  sadexdiinaasi (Shirguddoonka) haddii aad  soo midowdaan, Goluhuna wuu midoobayaa. Ilmaadeerayaaloow haddii aydaan midoobayn, waxaad na tidhaahdaan Saddex kale (Shirguddoon kale) keena, Golahan ayaananu soo dhex fadhiisanaynaa. Khilaafka waxa ka wayn Golaha’e yaanu inaga burburin.” 

Xisbiga KULMIYE oo ka digay khatar amni-darro oo ka soo korodha G. Sool

Hargeysa, 08 Feb, 2010 (Ogaal)- Xisbiga Mucaaradka ah ee KULMIYE, ayaa ka hadlay xaaladaha ammaan-darro ee dhawaanahan ka taagnaa Magaalada Laascaanood, waxaanu ka digay in ammaan-darradaasi horseeddo fidmo dalka ku baahda.

Warsaxaafadeed uu Xisbiga KULMIYE soo saaray oo uu ku saxeexan yahay Xoghayaha guud ee Xisbigaas Keyse Xasan Cige, ayaa lagaga hadlay arrimaha la xidhiidha ammaanka Laascaanood, waxaanay baaq u jeediyeen Axsaabta Qaranka, Xukuumadda iyo shacabka Somaliland-ba.

Warsaxaafadeedkaas oo dhamaystirani wuxuu u dhignaa sidan;

“Waxaynu  bilihii ugu dambeeyey la soconaa ammaan daradda kasoo cusboonaatay Gobolka Sool gaar ahaan magaalada Laascaanood halkaaso ay qaraxyo isdabajoog ahi ka dhaceen.

Qaraxyadaasi  is-dabjooga ahaa waxay sababeen disho iyo dhaawac fara badan oo ku yimiid  saraakiil  xilal  waaweyn ka hayey  dawladda iyo shacabweynaba; waxaana soo waajahay shacabweynaha reer Sool argagax , cabsi xoog leh iyo waliba tuhun soo kala dhexgalay shacabka reer Sool iyadoo ilaa hadda aan maxkamad la hor keenin dambiilayaashii falalkaasi aragagixiso geestay.

Waxaa  mar marka ka dambaysa soo badanaya qaraxyada laga fulinayo Gobolka Sool kuwaasoo laga hoggaaminayo aaladaha laga hago meelaha fogfog (remote controls), oo ah arrin ku cusub Somaliland.

Shaki kuma jiro in haddii ay qaraxyadani sii socdaan ay u  horseedi doonaan Somaliland fidno iyo burbur aad u ballaadhan oo curyaamin kara geedi socodka nabadda, xassiloonida iyo dimoqraadiyad aynu maanta hadhsanayno.

Sidaasi daraadeed wuxuu Xisbiga Kulmiye ugu baaqayaa Xisbiyada Qaranka, Xukuumada iyo shacabweynaha inay si wadajira isaga kaashadaan sidii looga hortegin lahaa fidnada ka bilaamatay Sool iyo sidii loo sugi lahaa ammaanka iyo xassiloonida Jamhuuriydda Somaliland.

Waxaa kaloo uu Xisbiga Kulmiye ku boorinyaa  shacabweynaha Somaliland inay ka wada tashadaan sidii gacan adag loogu qaban lahaa cadowga naxariista daran ee kusoo duulay dalkooda.” 

Isgaadhsiinta gobolka Sool oo xayiraadii laga qaaday

Caynabo: Wasiirro Xukuumadda ka tirsan oo Xabsiga ku booqday 65 qof oo arday u badan

Laascaanood 08, Feb.2010 (Ogaal)- Wefti Wasiiro ah oo ka socday Xukuumadda Somaliland oo todobaadyadii u dambeeyay ku sugnaa gobolka Sool, ayaa shalay xabsiga degmada Caynabo ku booqday 65 arday iyo dhalinyaro ah oo lagu soo qabqabtay mudaharaad ay doraad ka dhigeen Laascaanood.

Sida uu ku soo waramay weriyaha Wargeyska Ogaal ee gobolka Sool, Xukuumaddu waxay shalay fasaxday Isgaadhsiinta gobolkaas ka dib markii ay 25 bishii aynu ka soo gudubnay xayirtay.

Go’aanka Xukuumaddu hore ugu xayirtay Isgaadhsiinta gobolka Sool, waxay ku sheegtay mid lagu xoojinayo amaanka gobolkaas, ka dib markii muddooyinkii u dambeeyay qaraxyo khasaare keenay ruxeen magaalada Laascaanood.

Dhinaca kale, wefti Wasiiro ah oo Xukuumadda Somaliland ka socda oo todobaadyadii u dambeeyay ku sugnaa gobolka Sool, ayaa shalay Xabsiga degmada Caynabo ku booqday 65 dhalinyaro ah oo arday u badan, kuwaasoo lagu soo qabqabtay mudaharaad ay doraad ka dhigeen magaalada Laascaanood.

Taliyaha Booliska degmada Caynabo Jaamac Ibraahim Aadam oo warbaahinta u waramay, waxa uu sheegay in 26 ka mid ah dhalinyaradaa xabsiga la dhigay ay gabdho yihiin.

Taliyuhu waxa uu sheegay inay baadhitaan ku hayaan dhalinyaradaa mudaharaadka ay dhigeen lagu qabqabtay. 

“Xataa haddii Midowga Yurub iyo NATO awood Milateri adeegsadaan, ma soo celin karaan Nabadda Soomaaliya”

Wasiirka Khaarajiga Spain 

Munich 08, Feb.2010 (W.Wararka/Ogaal)- Ururka Midowga Yurub, ayaa sheegay in iyaga iyo isbahaysiga NATO aanay awood u lahayn inay nabad ku soo celiyaan Soomaaliya.

Wasiirka Khaarajiga dalka Spain, ahna madaxa siyaasadda dibadda ee Midowga Yurub Mr. Meekawil Mishal, ayaa sheegay in xataa haddii ay awood Milateri adeegsadaan aanay awood u lahayn xasilinta Soomaaliya oo labaatankii sannadood ee u dambeeyay dhibaatooyin ka taagnaayeen.

Wasiirka Khaarajiga Spain oo ka hadlayay shir lagaga hadlayay arrimaha nabadgelyada caalamiga ah oo ka dhacay magaalada Munich ee dalka Jarmalka, waxa uu sheegay in amaanka qaarada Yuurb ku xidhan yahay dalalka deriska la ah eek u yaala qaarada Afrika iyo Bariga dhexe.

Wasiirku waxa uu sheegay in Budhcad-baddeeda Soomaalidu sii labanlaabeen hawlaha afduub ee ay wadaan, taasna ay sabab u tahay xaalada cakiran ee ka taagan dalka Soomaaliya.

Waxa uu sheegay in aanu xalku ku jirin in awood Milateri loo adeegsado Soomaaliya, isla markaana ay keenayso inay xaaladu ka sii darto.

Hase yeeshee, Raysal-wasaaraha Spain oo todobaadkii hore ka qaybgalay shir madaxeedkii Afrika ee Addis Ababa, waxa uu shegay in xalka Soomaaliya ku jiro in awood Milateri loo adeegsado.

Somaliweyn Media Center (SMC)