Imaam caan ah oo kumanaan doolar ugu deeqay mashruuc lagu dhisayo kaniisad.

Madaxa golaha imaamyada dalka Ghana Sheekh Cusmaan Sharubutu ayaa in ka badan 8,000 oo doolar ugu deeqay mashruuca dhismaha kaniisadda qaran ee muranka badan ka dhaliyay dalkaas.

Ghana waxay ku caan ku tahay isdhexgalka dadyowga aaminsan diimaha kala duwan inkasta oo deeqdan uu Imaamka ku bixiyay kaniisadda loo arko arrin lama filaan ah.

Imaamkan 102 jirka ah wuxuu sheegay in sababta uu dhismaha kaniisadda ugu deeqay dhaqaalahan ay tahay sidii loo xoojin lahaa xiriirka ka dhexeeyo muslimiinta iyo kiristaanka.

Labao sano ka hora yay aheyd markii Sheekh Cusmaan uu ka qeybgalay munaasabad duco ah oo ka socotay kaniisad, arrintaas oo dood badan ka dhalisay baraha bulshada dalkaas.

Dowladda Ghana ayaa dhawaan bilowday olole dadka ay ugu baaqeyso inay dhaqaale ay ugu deeqaan dhismaha kaniisadda.

Waxaana kaniisaddan laga dhisaya caasimadda Ghana ee Accra, waxaana lagu wadaa inay ku baxdo dhaqaale gaarayo $100 Milyan oo doolar.

Dad badan ayaa dhaleeceeyay mashruucan dhisitaanka kaniisadda oo ay ku tilmaameen mid lagu khaldamay oo ay aheyd in mudnaanta la saaro xoojinta dhaqaalaha dalkaas.