Howlgal ka dhacay G/Bay oo lagu khaarijiyay Maleeshiyaad ka tirsan Al-Shabaab

Muqdiso:-Ciidamada Xoogga Dalka oo kaashanaya kuwa Koonfur Galbeed ayaa weerar ku qaaday deegaanka Seydheelow oo ka tirsan gobolka Bay, halkaasi oo ay maleeshiyada Al-Shabaab ay ku dhibaataynayeen shacabka.

Taliyaha qeybta Booliska Gobolka Bay ee Dowlad goboleedka Koonfur Galbeed Gaashaanle Sare Amiin Maxamed Daruur oo la hadlay Wakaaladda (SONNA) ayaa sheegay in khasaare dhimasho iyo dhaawac ay halkaasi ugu geysteen koxda Al-Shabaab ayna deegaanka iminka ay gacanta ku hayaan.

“Howlgalkan waxaa qaaday ciidankeena, waxaana uu ka dhacay deeganaak Seydheelow,waxaa halkaasi lagu dilay 7-ka tirsan argagixisada Al-Shabaab, deegaankana hadda waxaa gacanta ku haya ciidanka dowladda,shacabkuna waa laga dulqaaday dhibtooda”. Ayuu yiri taliye Amiin.

Deegaanka uu dagaalka ka dhacay oo qayaas ahaantii 35 KM dhanka Waqooyi kaga began magaalada Baydhabo ee xarunta gobolka Baay ayaa waxaa horey ugu sugnaa maleeshiyada Alshabaab.

Taliyaha qeybta ayaa xusay in weerarka ay ku qaadeen deegaanka Seydheelow ay ka dambeysay kadib markii shacabka deegaanka uu codsi kaga yimid si looga dulqaado dhibaatada ay kala kulmayeen argagixisada.

Maleeshiyada Alshabaab ayaa dhibaato ku haaya shacabka,iyagoo badeecada gaadiidka saaran ay kagubaan si ay nolosha ugu ciriiriyaan dadaka,balse ciidanka xoogga dalka ayaa wada howlgalo ka dhan ah alshabaab meelaha ay kaga sugan yihiin gobolada dalka.