Madaxweynaha Jubaland oo ka hadlay hadalkii xukuumadda ee ahaa hirgelinta doorashada.

Xilli ay maalin kahor xukuumadda federaalka sheegtay inay hirgelineyso doorashooyinka loo ballansan yahay ayaa waxaa arrinkaas ka hadlay maamulka Jubaland.

Madaxweynaha Jubaland, Axmed Madobe oo maanta dib ugu laabtay magaalada Kismayo kadib safarkiisi Garowe ayaa shir jaraa’id oo uu ku qabtay Ksimayo waxaa uu ku sheegay in si xal looga gaaro muranka doorashada uu isaga iyo madaxdii kale ee Garowe ku shirtey ay ergo u soo direen Xamar, si jawaab looga keeno madaxda xukuumadda federalka.

Waxaa kale oo uu Axmed sheegay in ayada oo aan wax jawaab ah lagu soo celinin shir Jaraa’id lagu qabtay Xamar, taasina aysan marnaba xal keeni karin.

“Jubbaland waxay diyaar u tahay doorashada dalku inay waqtigeeda ku dhacdo loona maro nidaam heshiis lagu yahay gobolka ka maqana maamulkiisa iyo goobihiisa doorashada loo madax baneeyo Jubbaland taas oo ah xalka ugu haboon ee xaaladan lagaga gudbi karo” ayuu yiri Madaxweyne Axmed Maxamed Islaam.

.

Waxaa kale oo uu ku baaqay Madaxweyanaha in wadahal iyo wada ogol khilaafka lagu xaliyo ee aan la gaarsiinin meel aan hadhow laga soo celin karin.

Dowladda Soomaaliya ayaa sheegtay inay go’aansatay hirgelinta doorashooyinka la filayo in ay dalka ka dhacaan.

Doorashooyinkan oo wali uu muran ka taagan yahay ayaa xukuumadda federaalka waxay sheegtay in iyada iyo qaar ka mid ah maamul gobaleedyada ay arrintaas isla garteen.

War qoraal ah oo maalin kahor ka soo baxay xafiiska ra’iisul wasaaraha xukuumadda federaalka Soomaaliya, Maxamed Xuseen Rooble ayaa lagu sheegay in ra’iisul wasaaraha uu kulan la qaatay Madaxweyneyaasha dowlad goboleedyada Galmudug, Axmed Cabdi Kaariye Qoorqoor, Koonfur Galbeed Cabdicasiis Xasan Maxamed Laftagareen, Hirshabeelle Cali Guudlaawe Xuseen iyo Guddoomiyaha Gobolka Banaadir ahna duqa Muqdisho Cumar Maxamuud Maxamed Filish, ayna isla garteen oo ay go’aansadeen in la guda galo hirgelinta doorashooyinka, si aan wakhti kale looga lumin shacabka Soomaaliyeed.

.

Sidoo kale shir jaraa’id oo ay si wadajir u qabteen ra’iisul wasaare Roble iyo madaxweynayaahsa maamul goboleedyada Galmudug, Hirshabeelle, Koonfur Galbeed iyo gobolka Banaadir ayaa ra’isul wasaaraha xukuumadda waxaa uu sheegay in safarradii uu ku tegay qaar kamid ah gobolada dalka ay ahayd sidii loo xallin lahaa tabashooyinka ay qabaan qaar kamid ah maamul goboleedyada.

“Socdaallaadii aan ku tegay maamulada Koonfur Galbeed, Puntland iyo Galmudug waxay qeyb ka ahaayeen dedaaladii aan ku doonayay in dalka doorasho loo jaheeyo, wixii tabasha ahna si xilkasnima leh looga wada xaajoodo, si taas looga guul gaaro, xukuumadda federaalka waxay go’aansatay in lagu guda galo hirgelinta doorashooyinka, si aan wakhti kale looga lumin shacabka Soomaaliyeed, loogana fogaado wax alle wixii carqaladeyn kara fullinta heshiiskii doorashooyinka ee lagu gaaray magaalada Muqdisho sanadkii 2020-ka”, ayuu yiri ra’iisul wasaare Roble.

Sidoo kale waxaa halkaas ka hadlay madaxweynaha Galmudug oo sheegay in markii uu dhawaan tegay Garowe madaxda maamullada Puntland iyo Jubaland ay ka aqbaleen dhexdhexaadin.

“Waxay isoo dhiibeen qoddobo saddex ah oo ay ka dalbanayaan madaxda dowladda federaalka inay fulliyaan, si loo soo afjaro tabshooyinka ay ka qabaan arrimaha doorashooyinka, kadib waxaa shir la galay madaxweyne Farmaajo iyo ra’iisul wasaare Roble, intaas kadib waxaan dib ugu celiyay madaxweynayaasha Puntland iyo Jubaland go’aanka madaxda federalka ee doorashooyinka, si halka hadda la taagan yahay looga dhaqaaqo, dalkana ay uga dhacdo doorasho heshiis lagu wada yahay oo wkahtigeeda ku qabsoonto, waxaan rabaa in aan halkaan ku caddeeyo in wali wax jawaab ah aysan kasoo noqonin saaxiibadey, madaxda Jubaland iyo Puntland iyo dhinacyadii kale”, ayuu yiri madaxweyne Qoorqoor.

.

Ilaa iyo hadda ma kala cadda waxa uu ka dhigan yahay go’aanka dowladda iyo qaar kamid ah maamul goboleedyada oo doonaya in dalka ay ka dhacdo doorasho aysan qeyb ka ahayn maamulada Jubaland iyo Puntland, sidoo kale ay saluugsan yihiin dhammana musharrixiinta mucaaradka.

Dhanka kale wax war ah oo arrintaan la xiriira wali kama soo bixin maamul goboleedyada Puntland, Jubaland iyo siyaasiyiinta kale ee u hanqal taagaya xilka madaxtinimada Soomaaliya oo in badan oo kamid ah wax ka tabanayay hannaanka doorashooyinka loo marayo.

Xigasho:BBCSomali