Sanbaloolshe “Madaxweyne Farmaajo Dowladiisa waxay siyaasadeeysay dhismaha Ciidamada..”

Taliyihii Hore ee Nabadsugida iyo Sirdoonka Soomaaliya Cabdullaahi Maxamed Cali Sanbaloolshe ayaa dhaliilay sida ay dowladda Madaxweyne Farmaajo u maamusho Ciidamada & nidaamka Amniga ee dowladda Soomaaliya.

Sanbolooshe oo khudbad ka jeedinayay shirka Madasha Aragti Wadaaga Machadka Heratige ee Magaalada Garoowe ayaa sheegay in dowladda Madaxweyne Farmaajo ay siyaasadeeysay dhismaha Ciidamada, isla markaana hab beeleed loo kala saaray.

Waxaa uu sheegay in Ciidamada dowladda ee Al-Shabaab ka saaray degaanno badan oo ka tirsan Gobolka Hiiraan & shabeellooyinka loo yaqaano tuugo halka kuwa ka yimid Gedo, Buuhodle iyo degaano kale loo yaqaano kuweenna.

“ Nidaamka dhisida Ciidamada balantu waxay aheyd in la isla ogaado, hayeeshee waxaa jira Ciidamo aan la ogeyn oo loo diray Ereteriya, Madaxweyne farmaajo markii uu imaanayay wuxuu ciidamada u kala saaray Teamkeena iyo Tuugada’ ayuu yiri Sanbaloolshe.

Taliyihii Hore ee Nabadsugida iyo Sirdoonka Soomaaliya ayaa sheegay in hubka culus ee dowladda lagu taageeray loo dhiibay dad khaas ah dadka kalena laga ilaaliyay, isla markaana Todobaadkii la soo dhaafay Madaxtooyada laga saaray hub loo qeybiyay dad Shacab ah.

Dhanka kale Taliyihii Hore ee Nabadsugida iyo Sirdoonka Soomaaliya Cabdullaahi Maxamed Cali Sanbaloolshe ayaa wuxuu ka mid yahay dadka sida weyn u dhaliila hab maamulka dowladda Madaxweyne Maxamed Cabdullaahi farmaajo.