Wasiirka Amniga Jubbaland“Farmaajo ilma adeer baan nahay waxaan kula talinayaa in uu is casilo oo dalka dhaafo qaatana talada..”

C/Rashiid Xasan Nuur Janan Wasiirka Amniga Jubbaland oo boqolaal askari kula hadlaayay duleedka degmada Beledxaawo ayaa ugu baaqay Madaxweynaha Soomaaliya Maxamed Cabdullaahi Farmaajo iyo taliyaha NISA in ay faragalinta ka daayaan gobolka Gedo.

Waxaa uu sheegay in maalmihii la soo dhaafay dowladda Soomaaliya degmooyinka gobolka Gedo waxay diyaarado ku keentay ciidamo ay sheegtay inay yihiin kuwo la dagaallamaya Kenya,laakiin u jeedada laga leeyahay ay tahay in lagu caburiyo shacabka Gedo.

Wasiirka ayaa sheegay in wixii dhibaato ah oo ka dhasha ciidankaas ay mas’uuliyadooda qaadi doonaan Madaxweyne Farmaajo oo sheegay in meeshii uu degaan ahaan uu kasoo jeeday uu ciidamo ku qabsanaayo.

Ugu dambeyntii waxaa uu ugu baaqay Madaxweynaha in uu iscasilo, oo uu qaato talooyinka uga imaanaya bulshada Soomaaliyeed si uusan dalku u burburin.

“Farmaajo ilma adeer baan nahay waxaan kula talinayaa in uu is casilo oo dalka dhaafo qaatana talada musharixiinta in dalka laga qabtana kaalin ayaan ka qaadanayaa aniga iyo ciidankeyga” ayuu yiri wasiir Janan.