Nin Ka Tirsan al-Shabaab oo Lagu Maxkamadeynayo Mareykanka

WASHINGTON:-Cholo Abdi Abdullah, oo ah muwaadin u dhashay dalka Kenya ayay waaxda Cadaaladda Mareykanka ku soo oogtay dacwado la xiriira ficillo argagixiso iyo in uu ka tirsan yahay al-Shabaab.

Ninkan ayaa lagu soo oogay lix fal-damiyeed oo aragagixisanimo, oo ay ku jiraan inuu u shaqeynayayy urur argagixiso oo ajnabi ah (al-Shabaab), iyo in uu maleegaay shirqoo afduub diyaaradeed ah si uu Mareykanka ugu fuliyo weerar la mid ah kii 9/11.

Abdullah ayaa bishii July 2019 waxaa dalka Philippines loogu xiray eedeymo la xiriira dambiyo gudaha ah oo uu galay, waxaana 15-kii December loo soo masaafuriyey Mareykanka, si loogu maxkamadeeyo dacwadda lagu soo oogay.

“Sida la tuhmayo, Abdullah waxa uu isaga oo qeyb ka ah shirqool ay hagayeen hoggaamiyeyaal sare oo ka tirsan al-Shabaab uu dalka Philippine ku qaatay tababar la xiriira sida loo duuliyo diyaaradaha, isaga oo doonaya inuu afduubto diyaarad ganacsi kadibna ku dhufto dhisme ku yaalla Mareykanka,” waxaa sidaas yiri sii-hayaha xeer-ilaaliyaha Mareykanka ee Manhattan, Audrey Strauss.

Dacwadda ayaa waxaa lagu xusay in Abdullah, oo uu hagayo taliye sare oo ka tirsan al-Shabaab, uu 2016-kii u safray dalka Philippines, halkaasi oo intii u dhaxeysay 2017 illaa 2019 ku qaatay tababar la xiriira si loo duuliyo diyaaradaha, kadibna uu ka gudbay imtixaanka duuliyenimo si uu helo shatiga.

Waxa uu sidoo kale sameeyay cilm-baaris la xiriirta hababka diyaraadaha ganacsi loo afduubto, iyo sida loo helo dal-ku-galka Mareykanka, sii uu u fuliyo weerarka uu qorsheeyey, sida lagu sheegay dacwadda.

Lixda kiis dacwadeed ee lagu soo oogay Abdullah oo ah 30 jir ah, ayaa kala ah; shirqoolka taageero uu siiyo urur argagixiso (Al-Shabaab), shirqoolka inuu dilo muwaadiniin Mareykan ah, shirqoolka burcadnimo diyaaradeed, shirqoolka burburinta diyaarad iyo shirqoolka fulinta fal argagixiso oo ka gudbaya xuduudaha qaran.