FAO oo soo gabagabeysay wajiga 1-aad buufin lagu sameeyay Ayaxa ee Soomaaliya..

Hay’adda  Qaramada Midoobay u qaabilsan cunada iyo beeraha ee FAO aya sheegtay inay soo gaba gabeysay wajiga koowaad ee buufinta cayayaanka loo yaqaanno Ayaxa oo dhibaatooyin u geystay gobollo badan oo ka mid ah Dalka Soomaaliya.

Wajigan koowaad oo bilowday 1-dii August isla markaana socday ilaa 18 September ayaa waxaa laga fuliyay deegaanno ka tirsam Somaliland,Puntland iyo Galmudug.

Hay’adda FAO waxa ay tilmaamtay in maamulada deegaannadaasi ay gacan weyn ka geysteen barnaamijka la dagaalanka ayaxa.

Sidoo kale hay’addu  waxa ay sheegtay inay buufisay dhul gaaraya 12,827 hektar taasna ay badbaadisay raashiin u dhigma 7.7 malyuun oo doolar oo ay quudan karaan 170,919  oo qof .

Wajiga labaad ayaa Somaliland ka bilowday shantii bishaan aynu ku jirno ee October  waxaana Buufintan ay tahay mid loo adeegsanayo diyaarado iyadoo oo ay  jiraan in  ayax badan uu somaliland uga imaanaya dhanka itoobiya.