Maxay ka wada hadleen RW Rooble iyo Guddoomiyaha Baarlamaanka Hirshabeelle?

Ra’iisul Wasaaraha Xukuumadda Federaalka Soomaaliya Maxamed Xuseen Rooble ayaa xalay xafiiskiisa kulan kula qaatay Guddoomiyaha Baarlamaanka dowlad Goboleedka Hirshabeelle Sheekh Cismaan Barre Maxamed.

Qoraal uu bartiisa Facebook soo dhigay Guddoomiye Cismaan Barre ayuu ku sheegay kulanka dhexmaray isaga iyo Ra’iisul Wasaare Rooble uu ahaa mid la xiriiray Salaan, Hambalyo iyo Is-barasho.

Labada Mas’uul ayaa sidoo kale ka wada hadlay marxalada siyaasadeed ee dalka gaar ahaan Arimaha Dowlad Goboleedka Hirshabeelle, waxaana Ra’iisul Wasaare Rooble uu Cismaan Barre kula dardaarmay inuu dardar-geliyo howlaha shaqo ee Baarlamaanka.

Ra’iisul Wasaaraha Xukuumadda Federaalka Soomaaliya ayaa horey kulamo kala duwan ula qaatay Madaxweyneyaasha maamul Goboleedyada Hirshabeelle iyo Jubbaland, sidoo kalena la kulmay siyaasiga C/raxmaan C/Shakuur, Wasiiro, Xildhibaano iyo xubno kale.