Duqayn ka dhacday Jubbada hoose oo lagu dilay Horjoogayaal A-lshabaab ah.

Kismaayo:-10-ka tirsan maleeshiyada xagjirka ah ee Al-shabaab oo ay ku jiraan horjoogayaal ayaa lagu dilay duqayn xagga dhulka ah oo maanta ka dhacay deegaanka Dhaay-unboow iyo deegaano kale oo hoos taga tuulada Dhasheeg-waamo oo 60-km uga beegan dhinaca woqooyi magaalada Kismaayo ee xarunta KMG ee Jubbaland.

Horjoogihii maleeshiyada u qaabilsanaa Dhaay-unboow oo lagu magacaabi jiray Cabdi Maxamed Bashiir ayaa ka mid ah dadka duqaytaasi lagu dilay, waxaana dhaawac soo gaaray horjoogihii maleeshiyada u qaabilsanaa deegaanka Maroodi-gubow, oo magaciisa lagu soo koobay Xirow, kaas oo ay ula carareen degmada Jilib oo ka tirsan Jubada dhexe.

Duqayntaas oo ay fuliyeen Komandoosta Danab oo kaashanaysa ciidamo Maraykan ah ayaa lagu burburiyey fariisimo ay maleeshiyadu aagaasi ku lahayd iyo gaadiid ay isticmaalayeen, waxaana ku dhaawacmay 2-kale oo maleeshiyada ka tirsanaa, sida uu SONNA u soo wariyey Shirwac Cumar oo ka tirsan Idaacadda ciidamada qalabka sida.

Ciidanka Danab ayaa todobaadyadii ugu dambeeyey xoojiyey hawlgallada qorshaysan ee lagu beegsanayo maleeshiyada Al-shabaab, waxaana hawlgalladan ay wiiqeen awoodda kooxda ka dib markii todobaadkan laga qabsaday deegaanka Janaay Cabdalla oo ah goob istiraatiiji ah, una ahayd bar ay dhaqaalo ka soo galaan.