Beesha Caalamka oo Baaq u soo jeediyay Madaxda Dowlad-gobaleedyada ka maqan Shirka Dhuusamareeb 3

Dowladaha iyo Hay’adaha Caalamiga ee Taageera Somalia waxay maanta si Wadajir ah u soo saareen War-saxaafadeed ay kaga hadleen Xaalladda Siyaasadda ee dalka, Shirka Dhuusamareeb 3 iyo inay diyaar u yihiin inay bixiyaan hadba taageerada ay ka codsadaan dhammaan ka qaybgalayaasha Shirkaasi, si loo fududeeyo hirgelintiisa.

War-saxaafadeedka Beesha Caalamka soo saareen:

Saaxiibada Soomaaliya ee beesha caalamka (ee liiska hoos ku taxan) waxay soo dhoweynayaan in hoggaanka Dowladda Federaalka Soomaaliya iyo kuwa Dowladaha Xubnaha ka ah Federaalka ay magaalada Dhuusamareeb soo gaareen 15kii bishan Agoosto, si ay u billaabaan kulankooda xiga, sida qorsheysnayd.

Waxay sidoo soo dhoweynayaan billowga hawsha guddiga farsamo ee wadajirka ah ee loo xilsaaray diyaarinta xulashooyinka hanaan doorasho oo la isugu tanaasulay oo la isku afgarto si madaxu uga baarandegaan.

Saaxiibadu waxay si xooggan ugu dhiirigelinayaan madaxda Dowladaha Xubnaha ka ah Federaalka ee aan weli kulanka ku soo biirin inay si toos ah ula xiriiraan dhiggooda hadda jooga magaalada Dhuusamareeb si loo xalliyo wixii arrimo ah oo taagan si ay dhammaantood uga wada qaybqaataan.

Saaxiibadu waxay ku nuuxnuuxsanayaan inay muhim tahay in dhammaan madaxdu ay ka qaybqaataan shirmadaxeedkan si loo sii wado geeddi-socodka dhisidda isafgarad wadar-ogol ah, loona soo saaro heshiis ballaaran oo laga gaaro hanaanka doorashooyinka federaalka 2020/21 oo qanciya dhammaan saamilleyda Soomaaliyeed.

Waxay dhammaan madaxda xusuusinayaan muhiimadda ay leedahay ilaalinta horumarka laga gaaray dowlad-dhisidda Soomaaliya iyo ka soo bixidda ballamadii horey loo galay.

Iyadoo tan la eegayo, saaxiibadu waxay mar kale adkeynayaan in isku day kasta oo uu ku kaco mid keliya ama qaar yar oo ka mid ah saamilleyda oo si qasab ah loogu mariyo qaabab doorasho uusan yeelan doonin sharciyad isla markaana aan laga hirgelin karin iyadoo aan taageerada lagama maarmaanka ah laga helin dhammaan saamilleyda kale.

Saaxiibadu waxay si dhow ula socdaan waxyaabaha ka soo kordha kulanka magaalada Dhuusamareeb, waxayna dabagal ku sameynayaan tallaabooyinka lagu heshiiyo waxayna diyaar la yihiin inay bixiyaan hadba taageerada ay ka codsadaan dhamaan ka qaybgalayaasha si loo fududeeyo hirgelinta.

Qoraalka Saaxiibada Beesha Caalamka ee Somalia soo saareen waxay kala yihiin: Belgium, Britain, Denmark, Jabuuti, Mareykanka, Faransiiska, Finland, Hawlgalka AMISOM, Netherlands, Ireland, Ethiopia, Japan, Jarmalka, Kenya, Midowga Yurub, Norway, Spain, Sweden, Talyaaniga, Turkey, Uganda, Urur-Goboleedka IGAD, iyo QM.