Wasaaradda Ganacsiga iyo Warshadaha JFS oo Soo-dhaweyn u Sameysay Wasiiru-dawlahii Cusbaa ee Loo Soo Magacaabay Wasaaraddaas

Muqdisho:(SONNA)-Kulan lagu soo-dhaweynaayey Wasiiru-dawlaha cusub ee Wasaaradda Ganacsiga iyo Warshadaha JFS Mudane Cabdulqaadir Shariif Sheekhuna Maye oo dhawaan uu xilkaas uu u soo magacaabay Ra’iisal Wasaaraha Xukuumadda Federaalka Soomaaliya Mudane Xasan Cali Khayre, ayaa maanta lagu qabtay xarunta Wasaaradda ee magaalada Muqdisho.

Kulankan, ayaa waxa goob-joog ka ahaa Wasiirka Wasaaraddaasi Mudane Inj. Cabdullaahi Cali Xasan, Wasiiru-dawlaha Xafiiska Ra’iisal Wasaaraha Soomaaliya Mudane Cabdillaahi Xaamud Maxamed, Agaasimaha guud ee Wasaaraddaasi Mudane Cabdicasiis Ibraahim Aadan, La-taliyeyaasha, Agaasime Waaxeedyada iyo Marti-sharaf kale.

Agaasimaha guud ee Wasaaradda Mudane Cabdicasiis Ibraahim Aadan oo ugu horreyn halkaas ka hadlay, ayaa sheegay in kulanka ujeedkiisu uu yahay soo-dhaweyn ay Wasaaraddu ugu tallo-gashay Wasiiru-dawlaha cusub ee Wasaaradda oo dhawaan loo soo magacaabay xilka Wasaaraddaasi si uu u qabsado hawlahiisa shaqo ee Wasaaradda, waxaana uu xusay in Wasiiru-dawlahii hore ee xilkan hayey uu kulanka uga maqnaa safar uu wakhti hore ku tagay wadanka Ingiriiska isla-mar-ahaantanaa ay imaatinkiisa xanibeen diyaaradihii loo xidhay COVID-19 awgeed.

Wasiiru-dawlaha Xafiiska Raysal Wasaaraha Soomaaliya Mudane Cabdillaahi Xaamud Maxamed oo halkaas ka hadlay, ayaa sheegay inuu ku faraxsan yahay in Mudane Cabdulqaadir  Shariif Sheekhuna Maye uu maanta ku soo biiro Wasaaradda Ganacsiga iyo Warshadaha oo uu sheegay inay ka mid tahay Wasaaradaha ugu balaadhan dalka isla-mar-ahaantaana qeybta ugu weyn ka qaata kobcinta dhaqaalaha Soomaaliya, waxaana uu Madaxda Wasaaradda ku ammaanay dedaalada ay wadaan ee ay ku horumarinayaan Ganacsiga Soomaaliya.

Wasiiru-dawlaha cusub ee Wasaaradda Ganacsiga iyo Warshadaha JFS Mudane Cabdulqaadir Shariif Sheekhuna Maye oo dhankiisa halkaas kaga mahad-celiyey kulanka soo dhaweynta ah ee loo sameeyey, ayaa sheegay inuu ku faraxsan yahay inuu qabto xilka Wasiiru-dawlaha Wasaaradda Ganacsiga iyo Warshadaha, waxaana uu sheegay in marka hore ba Wasaaraddani ay ahayd Wasaaraddaha ugu wax-qabadka badan ee wakhtiyadii uu ahaa guddoomiyaha Baarlamaanka Koonfur-galbeeda Soomaaliya ay la socon jireen war-bixinahooda.

Mudane Cabdulqaadir Shariif Sheekhuna Maye, wuxu halkaas ka caddeeyey inuu door muhiim ah ka qaadan doono shaqooyinka socda ee lagu horumarinaayo Ganacsiga Soomaaliya iyo weli ba sidoo kale inay wanaagsan ay wada-shaqeyn buuxda u yeelan doonaan Madaxda iyo Shaqaalah kala duwan ee Wasaaradda.

Wasiirka Wasaaradda Ganacsiga iyo Warshadaha JFS In. Cabdullaahi Cali Xasan oo ugu dambeyn halkaas ka hadlay, ayaa sheegay in uu  marka hore Wasaaradda ku soo dhaweynaayo Wasiiru-dawlaha cusub ee loo soo magacaabay Wasaaradda Mudane Cabdulqaadir Shariif Sheekhuna Maye, waxaana uu halkaas war-bixin uu kaga siiyey shaqooyinka ay Wasaaraddu gacanta ku hayso, waxyaabaha u qabsoomay oo ay ugu horreeyaan dhinacyada shuruucda,  siyaasadaha iyo dedaalada lagu horumarinaayo ganacsiga, maal-gashiga iyo warshadeynta Soomaaliya.

Inj. Cabdullaahi Cali Xasan oo hadalka ku dheeraaday, wuxu sidoo kale sheegay in Wasaaraddu qabatay shaqooyin badan isla-mar-ahaantaana ay Wasiiru-dawlaha cusub ka rajeynayaan inuu dhiig cusub ku shubo dedaalada socda ee Wasaaraddu wado, waxaana uu carabka ku dhuftay in madaxda iyo shaqaalaha kale ee Wasaaraddu ba ay diyaar u yihin inay si buuxda u la shaqeeyaan.

Wasiirka Ganacsigu, wuxu ugu dambeyn,  uu halkaas ka boggaadiyey Wasiiru-dawlahii hore ee Wasaaradda Ganacsiga iyo Warshadaha Dr. Daahir Cabdi Cabdullaahi( Dr. Goo) oo uu sheegay in uu muddadii uu xilkaas hayey uu si wanaagsan u la soo shaqeeyey Wasaaradda isla-mar-ahaantaana uu mudan yahay amaan iyo boggaadinba.