Amnesty International oo soo saartay Warbixin ku saabsan Tacadiyadii Xuquuqda Aadanaha ee dhacay sanadkii la soo dhaafay ee 2019-kii.

Hay’adda u dooda Xuquuqda Aadanaha ee Amnesty International ayaa soo saartay Warbixin ku saabsan Tacadiyadii Xuquuqda Aadanaha ee dalalka Caalamka ka dhacay sanadkii la soo dhaafay ee 2019-kii.

Warbixinta oo koobnayd 39 bog ayaa waxaa lagu muujiyey in 657 qof lagu dilay 20 Waddan oo ka mid aha caalamka,waxaana liiska hore ka galay dalalka Shiinaha, Iran, Sacuudiga, Iraq, Masar, Maraykanka iyo Pakistan.

Hay’adda oo Fadhigeeda Dhexe yahay magaalladda London waxaa kaloo lagu soo bandhigay Saddexda Waddan ee Carabta ee dilalka ugu badan laga fuliyey sanadkii hore ee 2019-kii ka dib abla-ablayn lagu sameeyay guud ahaan wadamada Carabta.

Warbixinta waxaa lagu sheegay in ay jiraan Dalal Carbeed oo sanadkii hore laga fuliyey Dilalka ugu badnaa, liiska dalalka Carbeed ee laga fuliyey dilalkii ugu badnaa sanadkii hore waxa ay kala yihiin:

Waddanka Sacuudiga ayaana ugu horeeya, iyadoo 184 qof lagu fuliyey Xukunka Dilka sanadkii hore 2019 sida lagu sheegay war-bixin sanadeedka Hay’adda u dooda Xuquuqda Aadanaha ee Amnesty International.

Dalka Iraq ayaa galay kaalinta labaad ee wadamada Carabta, waxaana Xukunka dilka lagu fuliyey 100 qof gudaha dalkaasi.

Dalka Masar waxaa xukunka dilka lagu fuliyey 32 qof sida lagu sheegay warbixinta.

War-bixinta oo shalay soo baxday ayaa sidoo kale lagu sheegay in Soomaaliya sanadkii hore xukun dil lagu fuliyey 12 qof.

Dalka Yemen waxaa xukuno dil ah lagu fuliyey 7 qof.

Hay’adda u dooda Xuquuqda Aadanaha ee Amnesty International waxay muujisay in dalka Maraykanka lagu fuliyey xukunka dilka 22-qof, kuwaasi oo dilkooda loo adeegsaday Cirbado sun ah oo lagu duray, halka Shiinaha aan la ogeyn tirada dadkii lagu dilay sanadkii hore, maadaama aysan Maamulayaasha dalkaasi soo bandhigin tirada dadka ay ku fuliyaan xukunka dilka ah.

Waddanka Iran waxaa la sheegay in sanadkii hore lasgu dilay 251-qof oo uu ku jiray Wiil isagoo aan qaangaarin loo xiray eedeyn ku aadan in qof dilay,halka Pakistan warbixinta lagu sheegay in sanadkii hore xukuno dil ah lagu fuliyey 14-qof iyo dalka Koonfurta Suudaan lagu dilay 11-qof.

Wadama inta badan kaalmaha hore ka soo muuqday ayaa waxaa ka mid ah dalalka ka soo kabsanaya colaadaha Sookeeyo sida Soomaaliya, Ciraaq, yaman iyo Suuriya.