Guddiga Doorashooyinka Qaranka Soomaaliya oo soo Bandhigay 6-Qodob oo ku saabsan Doorashadda.

Guddiga Doorashooyinka Qaranka Soomaaliyeed ayaa ka hadlay war-saxafadeedkii kasoo baxay Beesha Caalamka ee looga hadlayay doorashadda Soomaaliya ka dhacaysa 2020/2021-ka


War-saxafadeed kasoo baxay Guddiga Doorashooyinka Qaranka Soomaaliyeed ayaa lagu sheegay in la diyaariyay wadadii lo mari lahaa qabashadda Doorashadda.

Halkaan hoose ka Akhriso War-saxafadeedka

“Guddiga Madaxa Bannaan ee Doorashooyinka Qaranka waxa uu ka mahadcelinayaa taageerada beesha caalamka iyo ka go’naanta ay u muujiyaan inay garab istaagaan Guddiga iyo howlgalka doorashada.

Guddigu wuxuu caddaynayaa in uu diyaariyay howlaha farsamo ee muhiimka u ah u diyaar garawga hirgelinta doorashada. Wuxuu guddigu rajaynayaa in arrimaha muhiimka u ah doorashada lala garab istaago sida diyaarinta miisaaniyadda doorashada, sugidda amniga goobaha diiwaangelinta iyo codbixinta,

Dhamaystirka sharciyada lagama maarmaanka ah gaar ahaan sharciga doorashooyinka in Golaha Shacabku ansixiyo waqtigii lagu ballamay si uu saldhig ugu noqdo qabya tirka xeerarka doorasho ee na horyaal.

Guddigu wuxuu rajaynayaa in nidaamka doorasho ee ku soo baxa sharciga uu noqdo mid la fulin karo isla mar ahaantaana tixgelin gaar ah la siiyo arrimahan soo socda marka go’aan laga gaarayo nooca doorashada iyo nooca diiwangelinta ee la ansixinayo:

  • In nooca doorashada la waafajiyo mabaadida Dastuurka JFS, iyo Sharciga Axsaabta
  • In hirgelintiisu ilaaliyo xuquuqda muwaadiniinta ka qaybgalaya doorashada (tartame iyo codbixiye).
  • In aan GMDQ la saarin mas’uuliyad fulinteedu adagtahay sida soo saaridda habraaca astaynta deegaan doorashada iyo dhowrista qoondada dumarka.
  • In nooca doorasho uusan horseedin khilaaf iyo dagaal, ilaaliyana midnimada iyo wadajirka dalka iyo dadka Soomaaliyeed.
  • In uu ilaaliyo xaquuqda dhallinyarada, dadka baahiyaha gaar ah qaba iyo dadka aan hadda baarlamaanka metelaad ku lahyn.
  • In GMDQ la siiyo fursad uu ku xulan karo nooca diiwangelinta codbixiyaha haddii uu arko in uu la jaanqaadi karo duruufaha ku xeeran ama saamaynta ku yeelan kara hawlaha doorashada.

Ugu dambayn waxaan codsanaynaa in Guddiga lagu garab istaago waajibaadkiisa dastuuriga ah, lana siiyo tixgelin duruufaha uu ku shaqaynayo.