Maamulka Puntland oo ku dhawaaqday inta ay la eg yihiin Maraakiibta wada Kaluumaysi sharci daro ah

Dowlad Goboleedka Puntland ayaa shaaciyay tiradda Maraakiib iyo dalalka laga leeyahay,kuwaasi si sharci darro ah uga kalluumeysta Xeebaha ku yaalla deegaanada Puntland.

Wasaaradda Kalluumeysiga iyo Kheyraadka Badda ee Dowlad Goboleedka Puntland Faarax Cawaash Beeldaaje oo Shir Jaraa’id ku qabtay Magaalada Boosaaso ayaa waxaa uu sheegay in Maraakiibta Kalluumeysiga sharci darrada ka wada Puntland ay gaarayan ilaa iyo 18 Markab.

Wasiir Faarax Cawaash Beeldaaje ayaa waxaa uu tilmaamay in Maraakiibtaas ay yihiin kuwo markata Puntland ka sameeya Kalluumeysi sharci darro ah,isla markaana dacwad ay ka gudbiyeen ayna Ciidamo dheeraad ah u diri doonaan Xeebaha Puntland si ay uga hortegaan arrintaasi.

Wasaaradda Kalluumeysiga iyo Kheyraadka Badda ee Dowlad Goboleedka Puntland ayaa sheegay in Maraakiibtaas laga leeyahay dalka Iiraan, Hindiya iyo Pakistaan,isla markaana ay ku yihiin ku caan baxay kaluumeysiga sharci-darrada iyo gurashada kheyraadka ku jira Xeebaha Puntland.

Dhanka kale inta badan Maraakiib laga leeahay dalal kale ayaa Xeebaha Soomaaliya ka sameeysta Kalluumeysi sharci darro ah kana gurta kheyraadka ka buuxa,iyadoona aysan jirin cid iska xilsaartay sidii looga hortegi lahaa Kalluumeysigaas sharci darrada ah.