Qarax qasaare geystay oo ka dhacay agagaarka isgoyska Km4 ee magaalada Muqdisho

Faah faahin dheeraad ah ayaa laga helayaa qarax Miino oo saakay ka dhacay degmada Hodon ee magaalada Muqdisho, kaasi oo khasaare geystay.

Miino nooca dhulka lagu aaso ayaa lala eegtay gaari noociisu ahaa Toyota HILUX, waxaana la socday agaasimaha isbitaalka xoogga dalka iyo askar ilaalo u ahayd, xilli ay marayeen meel ku dhow carwadii hore ee Taleex, degmada Hodon.

Labo qof ayaa ku dhaacmay qaraxan, waxaana ay kala ahaayeen agaasimaha Isbitaalka Xoogga, Khadiijo Iimaan Caynte iyo Darawalkii Gaarigaasi oo magaciisa naloogu sheegay Aadan Yare.

Goobta qaraxan uu ka dhacay ayaa waxaa gaaray ciidamada Booliiska, kuwaasi oo bilaabay baaritaan aan weli wax natiijo ah laga soo saarin.

Dhinaca kale Miinada qaraxday ayaa la sheegay in dhulka ay ku aasneyd, iyadoo wadadaasina tahay mid inta badan ay dadweynuhu adeegsadaan, islamarkaana mashquul badan.

Ammaanka magaalada Muqdisho ayaa maalmihii ugu dambeeyey ahaa mid soo hagaagayey tan iyo wixii ka dambeeyay qaraxii lagu khaarajiyay Guddoomiyihii gobolka Banaadir Eng. C/raxmaan Cumar Cusmaan (Yariisow) iyo xubno maamulkiisa ka tirsan.