UNSOM oo sheegtay inay dib u soo celinayaan Xiriirkii ay la lahaayeen DFS.

Ku-xigeenka Hawlgalka QM ee Taageeradda Somalia (UNSOM),Raisedon Zenenga wuxuu xalay u sheegay Golaha Ammaanka ee QM inay dib u soo celinayaan Xiriirkii ay la lahaayeen DFS, kadib, markii ay DFS horey u cayrisay Ergaygii Khaaska ee Xoghayaha Guud ee QM ugu qaabilsan Arrimaha Somalia.

Mr.Zenenga wuxuu sheegay inay horumar wanaagsan ka sameeyeen dib-u-soo-celinta xiriirkaasi, inkastoo uu tilmaamay inay jiri karaan caqabado iyo inay weli jiraan qoddobo tijaabo u noqon kara Xiriirkaasi.

Ku-xigeenka Hawlgalka QM ee UNSOM,Raisedon Zenenga wuxuu hoosta ka xariiqay inay wada hadaladu meel wanaagsan marayaan, marka loo eego xaalladii jirtay bilowgii sannadkan.

Wada-xaajoodyadii uu la yeeshay Ra’isul-wasaaraha DFS, Xasan Cali Kheyre ayuu ku sheegay inay yihiin kuwo wax dhisaya, tan iyo wixii ka dambeeyey booqashadii uu Kaaliyaha Xoghayaha Guud ee QM ee Arrimaha Siyaasadda, Romsemary DiCarlo ku yimid Muqdisho bishii Feberaayo ee sannadkan.

Waxa uu intaasi ku daray inuu Ra’isul-wasaare Kheyre sheegay inay xoojinayaan Xiriirka QM, lana shaqeyn oonaan Ergayga Qm ee la soo magacaabi doono.

Dhinaca kale, DFS waxay bishii Janaayo 1-dii ee sannadkan dalka ka cayrisay Ergaygii hore ee Xoghayaha Guud ee QM ee Arrimaha Somalia, ahaana Madaxii Hawlgalka UNSOM, Nicholas Haysom, kadib, markii la sheegay inuu yahay Shaqsi aan laga jeclayn Somalia.