Masjidka Qaaradda Afrika ugu weyn oo laga dhisay dalka Algeria+Sawirro

Masjidkaasi waxa uu dhismihiisa socday muddo 7 sanno ah, waxaana ku baxday in ka badan Hal Billion oo dollar.

Masjidkan cusub oo loogu magac-daray Masjidka Jamaaca ee Algeria waxa uu ku fadhiyaa masaafo dhan 400,000 oo mitir oo isku wareeg ah, wuxuuna leeyahay Minaaradda dhererkeedu dhan yahay 265 mitir.

Masjidkaasi oo laga dhisay caasimadda dalka Algeria ee Algeris waxaa markiiba ku tukan kara ilaa 120,000 qof, waxa uu leeyahay Dugsi Qur’aan, Maktabad, Baar laga cunteeyo, Xarun Cilmi-baarista Taariikhda dalka Aljeria iyo Masrax lagu qabanayo Muxaaradaha iyo Khudbadaha Diiniga iyo barxad la dhigan karo 7,000 oo gaari

Masjidka cusub ee Jaamaca ee dalka Algeria waxa uu haatan noqday Masjidka 3-aad ee ugu weyn Caalamka, marka laga reebo Labada Masjid ee ka weyn ee Maka Al-mukarama iyo Madiina Al-munawara ee dalka Sacuudiga.

Masjidka Jamaaca ee laga dhisay caasimadda dalka Algeria ee Algeris waxa kale oo uu noqonayaa inuu leeyahay Minaaradda ugu dheer Afrika, waxaana soo labeeya Masjidka Booqr Xsaanka Labaad ee magaalladda Kaasabalanka ee dalka Morooko.

Si kastaba ha ahaatee, Masjidka Jamaaca ee laga dhisay caasimadda dalka Algeria waxaa maaalgeliyey Madaxweynihii hore ee dalkaasi, C/casiis Butafaliiqa oo xilka ka degay bilowgii bishan April, waxaana hirgelisay Shirkad laga leeyahay dalka Shiinaha oo lagu magacaabo The China State Construction Engineering Corporation (CSCEC).