Taliska Booliiska Soomaaliya oo Faahfaahin ka bixiyay Qarax ka dhacay Isgoyska Dabka ee Magaalada Muqdisho.

Taliye Ku-xiggeenka Ciidanka Booliska Soomaaliya Sarreeye guuto Zakia Xuseen Axmed oo la hadashay warbaahinta Dowladda ayaa ka warbixisay Qarax maanta ka dhacay Isgoyska Dabka ee Magaalada Muqdisho.

Gen. Zakia ayaa sheegtay in Gaariga qarxay Noociisu uu yahay Toyota Harrier, islamarkaana la hordhigay dhismo u dhow isgoyska dabka ee magaaladda Muqdisho, kadibna uu qarxay, waxaana Qasaaraha ka dhashay Qaraxaasi ay ku sheegtay inay yihiin Afar qof oo dhimasho ah iyo Shan kale oo Dhaawac ah.

“Gaari noociisu yahay Toyota Harrier oo la hordhigay dhismo u dhaw Isgoyska Dabka ayaa qarxay, Ilaa iyo hadda inta aan xaqiijinnay waa 4 dhimasho iyo 5 dhaawac ah, Waxaan tacsida iyo tiiraanyada la wadaagaynaa ehelada dadka dhintay, kuwa dhaawaca ahna Eebe degdeg ha u bogsiiyo” ayey tiri Gen. Zakia

Taliye Ku-xiggeenka Ciidanka Booliska Soomaaliya Sarreeye guuto Zakia Xuseen Axmed ayaa shacabka Soomaaliyeed mar kale ugu baaqday in ay muujiyaan Taxaddar, islamarkaana Booliska iyo Laamaha ay kusoo war geliyaan Gawaarida laga Shakiyo.