Kooxda Macawiisleyda ee dagaalka kula jirta Al shabaab oo ballaanqaad taageero

Sareeyo Guuto Maxamuud Maxamed Macalin Koronto Taliyaha qaybta 27-aad ee Ciidamada Xoogga Dalka ee ka howlgala Gobolada Shabeelaha Dhexe iyo Hiiraan ayaa sheegay in ay gacan siinayaan Kooxdaan.

Taliyaha qaybta 27-aad ee Ciidamada Xoogga Dalka Soomaaliyeed iyo Saraakiil Ciidan oo la socoto ayaa tagay Deegaanada Gobolka Shabeelaha Dhexe ay kaga sugan yihiin Kooxda la magac baxday Macawuusley ee la dagaalanta Al-Shabaab.

Deegaanada Taliye Maxamuud Koronto uu tagay waxa ay hoos tagaan Degmada Cadale oo maalmihii lasoo dhaafay ay ku dagaalamayeen Kooxdaan iyo Al-Shabaab.

Waxa uu ka dalbaday in ay sii kordhiyaan Dagaalka ay kula jiraan Al-Shabaab, maadaama uu sheegay in Xoolahooda iyo Ceel biyoodyadooda ay ka ceshanayaan.

Ciidamada ayuu sheegay in ay la howlgali doonaan, hubka iyo saanadda ay u baahdaanne uu taliska diyaar u yahay in uu siiyo.

Sababta ayuu ku sheegay in ay Aqoon dheer u leeyihiin Deegaanada ay kula dagaalamayaan Al-Shabaab, sidoo kalena aan jirin Dan ka fogeyneysa in Ciidamada Dowladda ay dhexgalaan.