Wasiirro iyo Xildhibaano ka tirsan Baarlamaanka oo Magaalada Baydhabo gaarsiiyey Gar-gaar Daawo ah

Wafdi uu hoggaaminayo wasiirka wasaaradda Tamarka iyo khayraadka Biyaha ee Xukuumadda Soomaaliya oo wada sahay Daawo ah ayaa gaaray magaalada Baydhabo oo shalay Argagixisada Al-Shabaab ay labo qarax ka gaysteen.

Xildhibaan C/rashiid Gaboobe oo ka mid ah xubnaha Golaha Shacabka sidoo kalana qayb ka ah wafdiga wasiirka ayaa Warbaahinta Qaranka u sheegay in iyagoo fulinaya amarkii Madaxweynaha ay tageen magaalada Baydhbo isla markaana ay booqdeen qaar ka mid ah Isbitaalada magaalada ee la dhigay dadka dhaawacyada qaba.

“Anagoo ah wasiiro iyo xildhibaano waxaan fulineynaa amarkii Madaxweynaha dalka ee farayey inan gurmad u fidino dadkii shalay Argagixisada ay ku xasuuqeen magaalada Baydhabo “ayuu yiri Xildhibaan C/rashiid Gaboobe

Gaboobe ayaa sidoo kale sheegay in magaalada Muqdisho ay u soo qaadayaan dadka xaaladooda ay liidato si ay u helaan baxnaanin fiican.

“Waxaan soo qaadeynayaa dhaawacyada culus ee Baydhabo wax looga qaban waayey waxaan rabnaa inan keeno Muqdisho, waxaan la kulanay 47-dhaawac, qaarkood ayaa aad u darnaa”ayuu yiri Xildhibaanka

Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo ayaa faray Xukuumadda inay si deg deg ah gargaar caafimaad u gaarsiiso dhaawacyada culus ee sida bahalnimada leh argagixisada Alshabaab ay qaraxyo kula beeegsadeen magaalada Baydhabo.

Sidoo kale Madaxweynaha oo tacsi u diray ehelada iyo qaraabada dadkii ku shahiiday weerarkan arxan darrada ah ayaa ugu baaqay shacabka Soomaaliyeed in ay garab istaagaan qoysaska dadka ay dhibaateeyeen argagaxisada Alshabaab.