Madaxweyne Farmaajo: “Siyaasiyiinta Xanaaqsan Waxay ka hadlaan wax xun oo dadka qalbi jabinaya…”

Muqdisho: Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo oo ka qayb galay munaasabadda daahfurka barnaamijka dib u habaynta Waxbarashada Dadaweynaha ayaa sheegay in ay ka go’an tahay dowladda in dib loo xoojiyo nidaamkii waxbarasho ee lacag la’aanta ahaa ee ka jiray dalka.

Madaxweynaha ayaa khudbad u jeediyey kumannaan arday ah oo wax ka barata 24 Iskuul oo ku yaalla magaalada Muqdisho, ayna dhigtaan ku dhawaad 15-kun oo arday, iskuulladaas oo maanta si rasmi uga mid noqday nidaamka waxbarashada dawliga ah ee dalka.

“Waxbarashadu waa xuquuq aasaasi ah, qof walba oo caruurteenna ka mid ahna ay tahay in uu helo, waana waajib dastuurku na faraayo. Maanta awooddeeda Alle waa uu nasiiyay, waxaana ka shaqeynaynaa fulinta qorshaha ah in xuquuqda waxbarasho ee caruurta Soomaaliyeed aan dib usoo celino.”

Wasaaradda Waxbarashada iyo Tacliinta Sare ee dalka ayaa soo bandhigtay qorshaha ku aaddan waxbarashada lacag la’aanta ah, iyadoona ku dhawaaqday in macalimiinta iyo maamulka dugsiyada ku biiray nidaamka waxbarashada dowliga ah ay ka mid noqon doonaan shaqaalaha Dowladda Federaalka Soomaaliya.

Wasaaradda ayaa la wadaagtay Madaxweynaha nuqullo ka mid ah manhajka mideysan ee waxbarashada, waxa uuna kula dardaarmay khubarada Soomaaliyeed ee gacanta ku haysa manhajka ay xoogga saaraan kor u qadista wadaniyadda, isdhexgalka bulshada iyo kobcinta garaadka iyo garashada jiilasha soo kacaya.

Xukuumadda Federaalka Soomaaliya ayaa madasha ku soo bandhigtay qorshaha tayeynta macalimiinta oo wajigiisa koowaad lagaga hirgelinayo Caasimadaha Dowladda Goboleedyada xarumo lagu tababaro macalimiinta oo noqonaya madal ay isku dhaafsadaan macalimiinta khibradahooda dhanka waxbarista, sarena loogu qaadayo xirfadahooda.

Madaxweyne Famaajo ayaa bogaadiyey dadaallada Xukuumadda Federaalka Soomaaliya ee ku aaddan dhanka waxbarashada, isagoona tilmaamay in dhaqangelinta manhajka mideysan ee waxbarashada dalka uu qorshe istaraatiiji ah u yahay mustaqbalka waxbarasho ee ubadka Soomaaliyeed.

“Siyaasiyiinta Xanaaqsan Waxay ka hadlaan wax xun oo dadka qalbi jabinaya, waxay sheegaan in nagala adkaaday, hadalkaasi waa mid calaacal ah, siyaasiga xanaaqsan dadka wuxuu gaarsiiyay in dadka ay is dhiibaan, siyaasiga xanaaqsan shacabka hanaga qalbi jebin”. Ayuu mar kale yiri madaxweyne Farmaajo.

Farmaajo ayaa sheegay in siyaasiyiinta ay mar walba ku cel celiyaan waxyaabo ay ku niyad jebinayaan dadka Soomaaliyeed,,isla markaana ay beentii xalaal ka dhigeen.

Madaxweynaha soomaaliya ayaa sidoo kale sheegay in wax laga xumaado ay tahay in beesha caalamka loo sheego in ammaanka aan la isku haleyn Karin, taasi ayuu sheegay in marnaba aysan raali ka noqon doonin, isagoo Sheegay in siyaasiyiinta xanaaqsan ay hadalo calaacal ah ay ku hadlayaan.

Dhanka kale Madaxweyne Farmaajo ayaa uga mahad celiyey dalladihii aan dowliga ah ee waxbarashada iyo aqoonyahannadii Soomaaliyeed ee dadaalka ku bixiyey samato bixinta waxbarashada dalka iyo badbaadinta mustaqbalka ubadka Soomaaliyeed xilliyadii burburka.